Bricht zum DRÜ Weekend vom drissigscht/einedriisigscht Ougschte 2008
Biuder säge meh aus tuusig Wort. Aber mit dr Hartnäckigkeit vom DRÜ hani nid grächnet. I sötts ja afa wüsse: ds DRÜ isch nid nume es Team vo Wort (obschon das aube mit bsungerem Elan), sondern o es Team vo Tate. Drum hani mi häreghöcklet, e Tubak aazündet u uf ds Papier braacht, was öppe chönnti passiert si, a däm einisch meh dänkwürdige Aalass. Me seit, ds Einte oder ds Angere wo da gschribe isch, sigi sogar passiert… Aber läset säuber.
Ungerem Motto „back to the roots“ (me list „bäck tu de ruuts“, auo zrügg zur Ruth!?) heimer üs am Samschtig bir Beiz vo de Thuner Cavallerischte troffe, dert wo geng. Wyter hetts gheisse, dass mir öppe ir fougende Reihefoug öppis tüe ungenäh: zum erwache u stärke – sportlech u adrenalinhautig – öppis fürs Gmüet – ziemlech schpilerisch u Usduur fordernd – ache, uche, ache, uche, ache … – wieder öppis fürs Gmüet – going home.
Es het scho bim Träffpunkt aagfange. Dr Förschter isch niene ume gsi, u nach telefonischer Nachfraag het är la verlute, ufem Zettu schtöng „ca. 8:00 h Besammlig“. Dä guet Mano het no nid begriffe, dass es bi Ruedi „öppe“ nid git. He nu, är isch du cho, het zaut u heisst syt denn „Zirka Lützu“. Ig säuber ha o es Gschtürm gha. I ha gläse, me söu „ungepflegt“ cho. Gheisse hetts aber „unverpflegt“. So hani haut zmorge gässe, schtatt duschet. Gschmöckt hets emu kene.
Wüu mir nie wüsse, was mer mache u wo mir häregö, simer gschpannt gsi wine Pfileboge. Zum erwache u schterche het üs anes grosses Zmorgebüffet im Grizzlybär z’Forscht Längebüel gfüert. Chöit nech dänke, dass em Schuelmeischter u em Outomech d’Ouge glüüchtet hei. Was die zweh möge vernichte, geit uf ke Chuehut ufe. U schlank blybesi ono, das isch der Hammer.
Mir si wyter gfahre u bim „Seilpark Gantrisch“ glandet. Mou, dä mit em schportlech u adrenalinhaltig isch wahr worde. E jede het es Gschtäutli mit Röueli u Karabinerhaagge gfasset, u nachere churze Instruktion het mes glii drufabe im ganze Waudgebiet ghöre lache, stöhne, juuchze, u heilandtonnere. Mänge hets vertüüflet, dass er nid chli sportlecher sig. Mir hei üs aber ids Züüg gleit, wie nume öppis. Iidrücklech heimer bewise, dass mir Mönsche nid vom Aff chöi abstamme.
Es isch mitunter luschtig gsi, zuezuluege, wies dene tapfere DRÜ Manne isch gange. Es Paari si tatsächlech nume no i de Seili gahnget. So langsam gäge Namitag hets Du o der Letscht usem Waud vertribe. E chli müed isch Jede gsi. Aber für ds Plagiere het der Schnuuf no allewyl glängt. Da sig me ja plötzlech o ufem schwirigschte Parcour locker vo Ascht zu Ascht ghüpft. Aber äbe, gfägt hets sowieso.
Vorem Abfahre hets no es Maleur gäh. Wo Jumbo bim Outo het wöue der Koffereruum-Dechu zuetue, hett Housi no öppis vüregrüblet. Aber scho zschpät. Päng, der eint Egge vom Dechu am Housi zmits ufe Chopf. Wüu e Glatze nid so guet abfäderet, hets ziemlech tätscht. Dr Housi es Loch im Chopf, u jede het gwüsst, dass är nüt glehrt het, sit em letschte Usfluug im Tessin. Schüsch hätt är nämlech e Heum agha. Es het uf au Fäu blüetet, u wo Jede het gmeint är sig Dokter u chönn säge, was em Beschte zmache sig, het Du dr Wegglibeck si Apothek vüregno, u es Pflaschter ufkläbt.
D Reis isch wyter ids Oberland gange. Glii simer uf dr Engstligenalp gsi. Wunderschön hett sech d Landschaft im Schpätsummer präsentiert. Da chasch d Seeu no la bambele. Das heimer nachem Zimmerbezug im Bärghotel gmacht. Mir si nämlech no ufene Hoger klätteret u hei am Rüedu zueglost, wonis dr Handbau-Alpsäge het erteilt. Wie wahr, si syni Wort, wenn är seit, dass me nid nume cha derby si im DRÜ, sondern, dass me ou e Biitrag mues leischte. Mir hei gschwore, uf u näbem Schpifäud für ds Team iizschtah.
Nachem Znachtässe, Dir chöit nech die lüüchtende Ouge vom Schuelmeischter u Outomech einisch meh vorschteue, hei mir üs mit Usduur em Schpile zuegwändet. Dass no Eine oder Zwee usem Chrüttergarte si derby gsi isch o klar. Wo em Appezäller sis Nationalgetränk usgange isch, hett är sech no mit es paar Kamerade em wysse Trubesaft zuegwändet. Zu de Fouge schpäter meh!
E zünfige Jass darf natürlech nid fähle. U sit nöischter Zyt u der damalig guete Iifüerig dür üse Pokerer, mache mir o das Schpiu us Amerika mit de Tschips. Es git immer wieder öppe Eine, wosech sis Sackgäud tuet ufbessere. Öbs serig het, wo när deheime vor der Regierig nid wüsse wie abrächne, blibt es Gheimnis. Irgendwie hetts Du e Jede irgendeinisch gschafft, das ihm zueteilte Zimmer zfinge.
Es het ja si Bscheid, am Morge ufnere Alp z’erwache. E wahri Pracht, wenn d Sunne hinger de Bärge vüre chunnt. Aber es het genau ei Chue unger öppe zighundert Viicher mit ere Glogge gha. U grad usgrächnet die einti Chue het am Morge früe vor üsem Fänschter müsse grase… Mau ke Chileglogge vo Zwöibrügge (D) im Zimmer, u nächär das. Item, d Chue het emu nid no vor ds Fänschter gschisse.
Mir heinis vo Adelbode no nid ganz verabschidet. Dr nächscht Haut isch bir Talstation vor Sillerebahn gsi. Das isch cheibe gäbig, sone Gondle. Da chasch zfüft, zsächst ine Metautrucke hocke, u die hänke si anes Kabu wo di dr Hoger ufe schriist. De musche nid tschiirgge…
Obe acho, het Jede es Trotti gfasset. Hosi het gschtöhnet „ändlech e Heum!“. Aha, das isch es auso, das ache – uche – ache… Mit em Trotti bis i d Mittustation abe suuse, u när mit der Gondle wider ufe. Ja das isch es goudi gsi. Ds „Ching im Maa“ isch fasch mit üs düre brönnt. „Gömer no mau?“ hets immer wieder gheisse. Mit jeder Abfahrt simer chli muetiger worde… Aber Obacht isch gliich aagseit gsi. Wies chönnti ga, het nämlech dr Appezäller müsse erfahre u üs sini Brämsschpure vomne angere Aalass mit Trotti zeigt. Sowieso hett är no d Nachwürkige vom vornächtleche Trybe gschpürt, und uf der Sunneterasse vor Bärgbeiz zfride gschnarchlet.
Abgrundet het dä Usfluug no e wyteri Schpielrundi u es währschafts Bärg Zvieri mit Chäs, Brot, Fleisch, Wy u… vier lüüchtegi Ouge.
Einisch meh, het üs der Tätschmeischter es unvergässlechs Wucheändi bschehrt. Ganz härzleche Dank, Rüedu. Dir glingts immer wieder, Aaläss z organisiere, wos viu z Erläbe u z Lache git.
Mir fröie üs uf nächschts Jahr.
Mitwürkendi:
Tätschmeischter: Badertscher Ruedi
Dr Pokerer: Beeri Pascal
Leenker: Brunner Andreas
Outomech: Darmstädter Brian
Versicherigsheini: Hilpert Daniel
Schuelmeischter: Klopfenstein Alex
Versicherigsheini: Kyprian Lars
Vättu: Luginbühl Pascal
Zirka Lützu: Lutz David
Dr Jüngling: Mast Patrick
Dr Beamti: Peter Rolf
Housi (Schpiu Hannes): Portner Hans
Säckelmeischter: Sieber Jürg
Schryberling: Sigg Rolf
Jumbo: Sorgen Thomas
Appezäller: Studach Tobias
Wegglibeck: Wildhaber Peter
Verbandtussi: Willi Daniel
Ds tapfere Schniiderli: Schneiter Roland
MERCI RÜEDU